أجمل الأوقات

رديه بين الشاعر علي القحطاني والشاعر راشد بن جعيثن في مجلس صاحب السمو الأمير سعود بن بندر بالرياض:

هي أجمل الاوقات يوم اجتمعنا

فرصه سعيده يا الصديق المثالي

بظل ابو تركي فتى مجتمعنا

اللي عطانا للتفاهم مجالي

لا شك أنا خايف اليا من رجعنا

تنسـى الصداقه وانت يا القرم غالي

راشد:
الله يحيي زاير راح معنا

اعداد ما تمطر حقوق الخيالي

في ضيفنا ما قد شـرينا وبعنا

قدره حشيم ومنزله بالمعالي

وبرضاه يا نسل الاكارم طمعنا

صديقنا غالى جنوب وشمالي

علي:
خل القلم يجري على ما شـرعنا

وانا رجل وعزتي راس مالي

انا وراشد ما يخلص دلعنا

يمكن حدينا يا جماعه خيالي

ان كان ما تمشـي على الدرب ضعنا

وشفيك يا راشد تشد الحبالي

راشد:
على العلوم اللي قديمات دعنا

يا ابو محمد قبل هل الهلالى

في مركب الترحيب غصب طبعنا

الموج يلطم في خشوم الجبالي

ان كان حنا يا علي ما امتنعنا

ما سار مركب عزنا بالعدالي

علي:
هذه فعايلكم سمعنا وطعنا

عادات من ذيك القرون الخوالي

لولا الحشيم اللي له الرجل تعنا

لي الشـرف لبيت قرم الرجالي

نحبكم بالحيل ثم اندفعنا

والشك والله ما تصور ببالي

راشد:
ما ظن حنا بالحبايل وقعنا

الرب حامينا عزيز الجلالي

مهما يوصلنا الزمان وقطعنا

الطيب علومه تجي منه تالي

الله على بعض الخلايق رفعنا

وما همنا الثرثار في كل حالي