يا راشد
- الصفحة الرئيسية
- الاشعار
- إلى راشد
- يا راشد
عيني يا راشد جعل عينك مجاره
البارحه والنوم ما هي بوياه
من أبياتك اللي قلت بأجزل عباره
وبا حب ما في خاطري ويتمناه
الله يبيحك جاء بكبدي حراره
قلبي على ميهاف والحقته أقصاه
ذكرتني وقتٍ تعدى قطاره
تخيّله وتقول يا سعود ماحلاه
وأنت تخبر اني ما بقلبي جباره
ايلا أوحيت طاري البر قلت آه ثم آه
والبر ذا الايام جابه غياره
يخلع شهابه من مشابه ومن جاه
والله كريم يرد للوقت داره
ويبدل الله حالة العسـر بسواه
وأن إهتويت نمر بعض الصباره
نشـرف على اللي قلت ونحوف مرباه
فأركب معي وانا كفيل الخساره
شف بس وين تريد نصـى وننصاه
نبغي نجي بعض العجام بشطاره
الريح ساكن والمخاتل معفّاه
لي واق الأول قال كن ذا سماره
ولي واق الاخر قال لا والله أياه
وقعد له اللي في يمينه خياره
وحطه على راس الشعيره و عشّاه
وجابه وجينا في ذرى غار قاره
غارٍ قبل ملعام والعام جيناه
نبغي نجدد يا رفيقي وجاره
ومشبه الاخر ونحيي مصلاه
هذا وبعد ودّي بخطوى زباره
فيها العبل مثل العقاير جثاياه
تبغى لها وأنا خويك زياره
نسـري لها و أبو المساري بنلقاه
معنا دليلٍ بس نظرب زراره
ويقول صد يسار ويمين ثم هاه
شعر: سعود بن سالم العبدالله